السلام عليكم ,, اليوم ابوية سحلني من الفراش و جرني من ياخة الفانيلة ساعة 5 الصبح و دفرني للحمام بجلاق لكيت نفسي متربع عال مغسلة ماخذ وضعية التبييض ,, كمت و بقايا الحلم اللي جنت احلمه وية و شلون حلم ,, حلمت كاعد دا اريد اوكف تاكسي و اني واكف جوة تاتا ,, و ما اجاني تاكسي اجتني كفخة من ابوية طيرتني شاقوليا كما هو موضح فوقا قبل شوية ,, طبعا اني ركضت على ابوية عبالي صار بي صرع ,, و الا ليش سحلني اني ابنه فلذه بنكرياسه و بهارات الكعدة مثل ما ايسميني ,, (اني الابن الجبير و الابن الوسطاني و الابن الصغير كلها بنفس الوكت لان ما خلفو غيري)
- يابه شبيك ,, منو اتوفى ؟؟
- اليوم بال 7 صباحا تجي وياية لشركة النقل الدولي بالعلاوي حتى نحجز
- علاوي؟؟؟ ادري حجي كل هال هوسة سويتها حتى اتكلي راح اصعد للجوادر
- لك اثول اكله نقل دولي و نحجز لعمان يا جوادر؟؟؟
- عمان ؟؟ أدري يابه ترة الامارات غالية بعدين انته ما اتحب اتعيش بالامارات جان عندك شقة بأمارات الصالحية أجرتها و اشتريتنا هذا القصر المنيف (منيف منو؟)
طبعا ابوية عافني و هو يدردم بالروسي و يكول حسبي الله ونعم الوكيل امنيتي اجي على ابني و الكاه صاحي مرة وحدة بحياتي قبل ما عزرائيل يكرطني ,,
المهم ,, رحنا مشي لان العلاوي قريبة علينا ,, (37 كيلو متر)
ورة 19 ساعة كل ساعة 544 دقيقة ,, وصلنة للزوراء ,, عزمت ابوية على دخول الزوراء و اقترحت عليه نتفرج عال زرافة ,, هفني بعجل و كلي كمل اطلع كبل لك يا زرافة ابن الزرافة ,, وصلنا للعلاوي و فتنة للشركة مال النقل الدولي
شفت موظفة حلوة طويلة جنها طائر النعامة , ضعيفة و شعرها طويل واصل للصالنصة مال المنشأة اللي جانت طابكة على صفحة و شفتها الفوكانية بيها أرضة و الظاهر دا تعالجها لان اشتميت ريحة نفط كفخت بأذني , قصدي بخشمي , المهم سالتها بلا زحمة شركة النقل الدولي وين؟
كالت ابني سالمين انتة جواها هسة
- جواها؟؟ يعني هسة اذا اشيل راسي اراها؟؟
- ابني تراها شنو انته هسة بيها
- شبيها؟
- شنو شبيها انتة هسة بشركة النقل الدولي
- نفسها اللي سالت عنها قبل 4 أسطر لو غيرها
الموظفة باوعت على كعب حذائها الحاد و الرفيع و راها باوعت على خشمي و رجعت باوعت على حذائها
اني انسحبت و رجعت على ابوية لكيت 2 من الشرطة كل واحد كنتور ابو ال 12 باب ماشالله اذا وكفو بالسطح يسوون كسوف شمس و كسوف غيم ببغداد و ضواحيها لازمين ابوية و معتقليه بتهمة انه كرعيته مو قانونية
و ابوية كاعد يصيح بعلو صوته اضحك اضحك يا عراق اني احبك يا عراق .. طبعا اني غسلت ,, لحظة غسلت شنو ,, غلست و عفته لان جنت بعدني غاضب من ورة اسلوبه المو حضاري اللي كعدني بي بهال صبحية الكشرة ,اجوي عليه الشرطة كللولي هذا الرجال يكول هو ابوك اذا صحيح حتى انعوفه كتلهم اي شايفه هذا اصلا البارحة طفر علينة باك 3 قناني غاز و حطلي عبوة لاصقة جوة الميزانية و عطب عندي رسيفر و مجمدة ارجموه بالبتيتة ,, ذولة ما جذبو خبر و بدو يكتلون و الحجي يصيح مو كالو يدا بيد لا سلاح باليد شو انتو كل واحد شايل مخزن عتاد الحكوووووووووووووووووووووووووووووووونييييييييي , اني هم عفت الوضع و رحت على موظف بكدي تقريبا و سالته
- مرحبا عمو
- عمو؟؟ اتفضل
- اريد احجز لسلمان
- ابني سلمان منو جوارينكم ,, قصدك عمان
- اي ببيش الكييلو؟؟
- لك شعدنة ركي يا كيلو يا حكة امشي اطلع برة
- اخوية على كيفك اريد احجز بس اهم شي اريد اعرف سعبيش اجي لمطار بغداد ؟؟
- يعني بشرفك شركة نقل دولي شنصخم بمطار بغداد؟؟ منا نطلع عيوني من العلاوي
- يعني سعبيش المنشأة اتطير؟؟
- أتطيييييييييير؟؟
الموظف كام يباوعلي بطريقة حسستني انه راح يطلع الموبايل و يخابر 130 ,,,
- زين البيتزا عليكم لو اطلعها من غر مكان؟
- لا طلعها من سيتي سنتر ,, يا بيتزا عمو انتة ويامن جاي؟
- البيتزا هاي اللي اتفوتني لدمشق
- ابني اولا اسمها صخام فيزا بعدين احنة هنا عمان والله عمان و القرآن عمان يا دمشق دمشق اركب كيا توصل
- و منو اكلك اني اصلا اريد اروح لعمان؟؟
- لعد شعندك جاي؟؟
- لا مو اني اريد اروح للرطبة ,, فبس انزل بالبطريق
- يا بطريق؟؟
- بالطريق قصدي
البؤبؤ مال عين الموظف كام يفتر بزاوية 360 درجة و نزع القميص و كام يدك على فانيلته بيده مثل الشمبانزي و صاح شرطة ,, تعالو لزمو هذا المخبل ,, الشرطة عافو ابوية و جوي يكتلون بيه عبالهم ارهابي شي ,, و فوك القهر ابوية كللهم هذا ابني مخبل عندة شيزوفرينيا مزمنة خاطفني و يريد اكتبله نص البيت باسمه حتى يعوفني ,,, و ورة ساعة عافوني و من صحيت لكيت ابوية فرحان لانه صار عندة سبب مقنع للزيارة حتى يخلي بالاستمارة ,, " علاج ابني النص ستاو "
و الحمدالله اني هسة زين و كل ما اشوف منشاة ارجع ركض لبيتنا و دا اخذ فلو اوت حتى اتخلص من هاي الحالة ,, و الى ان انبسط مرة لخ هذا محشش مكرش يحييكم و يتمنى لكم اي شي بي خير و شخرا ,,
